ამერიკის საელჩო ნიკა გვარამიას პატიმრობაში დატოვებასთან დაკავშირებით განცხადებას ავრცელებს

1018
წაკითხვა/ნახვა
IMG.GE

ამერიკის საელჩო ნიკა გვარამიას პატიმრობაში დატოვებასთან დაკავშირებით განცხადებას ავრცელებს.

“იმ დროს, როდესაც საქართველოს ერთგულება მიუკერძოებელი სასამართლოსა და მედია პლურალიზმის მიმართ განსაკუთრებული დაკვირვების საგანია, მთავარი ოპოზიციური ტელეარხის გენერალური დირექტორის, ნიკა გვარამიას მიმდინარე პატიმრობა რისკის ქვეშ აყენებს ქართველი ხალხის მკაფიო არჩევანსა და საქართველოს ლიდერების გაცხადებულ მიზანს – უფრო უსაფრთხო, დემოკრატიული, ევროპული მომავლისა.

შეერთებული შტატების საელჩო კიდევ ერთხელ გამოხატავს ღრმა შეშფოთებას დღევანდელ გადაწყვეტილებასთან დაკავშირებით გვარამიას, იაშვილისა და დამენიას საქმეზე. არაერთმა საერთაშორისო და ქართველმა უფლებადამცველმა თავიდანვე წამოჭრა სერიოზული კითხვები ამ საქმის შესახებ, მათ შორის დროსა და ბრალდებებთან დაკავშირებით, აგრეთვე, მსჯავრდებისა და სასჯელის შესახებ. შერჩევითი გამოძიების, სისხლისსამართლებრივი დევნისა და მსჯავრდების აღქმაც კი ასუსტებს საზოგადოების ნდობას სამართალდამცავების, პროკურატურის, სასამართლოებისა და თავად ხელისუფლების მიმართ.

შეერთებული შტატები გააგრძელებს მედიის თავისუფლებისა და სასამართლო რეფორმის მხარდაჭერას, რაც აუცილებელია სტაბილური და წარმატებული დემოკრატიის ასაშენებლად და რაც ქართველი ხალხის მკაფიო სურვილია.”- ნათქვამია საელჩოს განცხადებაში, რომელიც მათ ოფიციალურ ფეისბუქზე გამოქვეყნდა.

შეგახსენებთ, თბილისის სააპელაციო სასამართლოში დღეს გამოცხადდა გადაწყვეტილება, რომლის მიხედვით, ნიკა გვარამიას დაცვის მხარის მოთხოვნა არ დაკმაყოფილდა და უცვლელი დარჩა წინა ინსტანციის სასამართლოს გადაწყვეტილება.

შეგახსენებთ, ნიკა გვარამიას მას 3 წლითა და  6 თვით პატიმრობა აქვს მისჯილი.

IMG.GE
გაზიარება